Laiwa sai 2009 ning, April (28) ya shani Myen Hpyen Asuya ni hku nna, KIO hpe BGF ngu ai mying hku nna shanhte Myen Hpyen Dap kata de hkrang galai jashawn la kau na lam tsun wa ma ai re.
BGF ngu ai gaw, Myen Hpyen Dap (Tat-ma-daw) a kata hta na Hpyen Hpung langai hku rai nhtawm, Myen Mung a mungdan jarit ni hta dap jung da nna, bungli shang sa wa na matu hte, dai BGF hpaw shabawn ai hta tinang Amyu Sha Dap hpung ni a ntsa Myen Hpyen Du ni shanglawm nna hpaw shabawn sa wa na hkyen ma ai re. (Ya ten, 1001,1002,1003 Jarit Sin Dap ni hpe yu la mai ai.) Shing rai nna, BGF hta shanglawm na matu asak aprat garan ai lam, hpaji madang garan ai lam, hkamja lam hte seng nna garan kau ai lam ni law law galaw na matu re hta n-ga, BGF hta shang lawm na ni yawng gaw, Myen Hpyen Dap a training bai kahtap lung la ra ai re. (Hpyen Ma, Hpyen Gyi, Hpyen Du ngu nna atsang garan nhtawm Myen Hpyen Hpaji hkaja sa wa na matu.)
Maga mi hku nna tsun ga nga yang, KIO/KIA hpe Myen Hpyen Dap shatai kau na matu re.
KRGF ngu ai gaw, KIO hku nna, Myen Hpyen Asuya wa hte No-2 lang hkrum shaga ai shaloi tang shawn ai lam re.
1976 ning kaw nna, KIO a mungmasa jasat gaw, "Jet ai Munghpawm gaw de sa wa na hte Kachin State hpe Rawt jat ai Mungdaw byin tai hkra shakut sa wa na matu re. Ndai mungmasa jasat gaw, mungkan kaw nna mung hkap la lu na lam re.
Lamawa na, shing re ai Jet ai Munghpawm gaw de sa wa lu sai rai yang, KIO a laknak lang ai rawt malan lam hpe Jet ai Munghpawm Asuya hku nna n-tsun tim, dawm jahkring kau na re hte, laknak matut lang ai lam n galaw mat sana re hpe KIO Ginjaw salang ni tsun lai wa masai.
2008 ning, hta jawm shagrin da lu sai, Munghpawm Constitution gaw Jet ai Munghpawm hkrang gaw n re ai raitim, dai constitution hte maren ra lata galaw nna lung wa na Mungshawa Asuya hte KIO hku nna, "Jet ai Munghpawm gawde sa wa na lam" hte seng nna matut bawngban mat wa na matu gaw KIO a myit mada lam rai nga ai.
Dai re majaw, KIO a laknak lang ai hpyen dap hpe ya jang wa mi hkrang galai ra wa ai raiyang, KRGF ngu ai "Wunpawng Ginra Makawp Maga Dap" ngu ai mying hte hkrang galai kau na lam, ndai KRGF hpe Myen Hpyen Dap kaw nna dan tawk yu reng ai hku n re sha, Kachin Mungdaw Asuya a kata kaw she tawn da na re lam, Kachin ni shanu nga pra nga ai Kachin State hte Shan State kata na Muklum mare shagu hta dap jung sa wa na lam ni chye lu ai.
Dai re majaw, KRGF hte BGF lam gaw,
BGF ngu ai gaw:- Wunpawng Amyu hte Wunpawng Mungdan Sha ni hpe KIO hte ga garan kau dat ai lam sha rai nga ai hta n-ga, "Jaw Prat Ka-ang Hkup" rai sai Wunpawng Amyu hte Wunpawng Mungdan Sha ni a Rawt Malan Labau lam hpe "Jahten Sharun" kau ya ai lam rai nga ai.
KRGF ngu ai gaw:- Wunpawng Amyu hte Wunpawng Mungdan Sha ni a "SHIM LAM"hte rawt kalu kaba lam ni hpe hkam dahka jaw ya lu na matu hte Wunpawng Amyu hte Wunpawng Mungdan Sha ni a akyu ara hpe matu gun-hpai lu na matu KIO hku nna tara shang hpaw shabawn sa wa mayu ai "Wunpawng Ginra Makawp Maga Dap" mying rai nga ai.
Ndai lam ni yawng gaw, KIO Ginjaw salang ni hte hkrum shaga ai lam ni hta na re. Anhte Wunpawng Ramma ni chye mai chye ging ai lam re.
Hkungga let,
Padang Len
e mail kaw na la bang da ai re
+++Jing Hpaw Wunpawng Kasa shiga »ndai blog kaw mung mai hti nga ai.
