San mayu ai! Chye mayu ai!
KIO, KDA, NDA-K
Daini na ten hpa majaw mungshawa hte rau n nga ai. Hpa majaw n sen zim taw nga ai?
Kaja wa mungshawa a matu galaw nga ai teng yang, daini na ten hpa majaw, "yu maram policy" hte SPDC hpe myiman tau agam nga ai?
Mungkan ting kadai mung n hkap la ai SPDC hpyen gumshyem hpe hpa majaw ya ten du hkra jinghku galaw nga ai?
Mungshawa gaw SPDC hpe ninghkap taw nga sai...hpa majaw KKK ni n pru wa ai..hpa majaw lamwoi ningshawng n galaw ai?
Makoi magap nna kadai mung kadai tinang a uphpung uphpawng a matu sha shajin galaw nga na kun?
Democracy asuya lung wa ai ten hta mung KKK ni Jinghpaw Wunpawng yawng a gawng malai nga nna kadai mung kadai chye ai hku naw tsun shaga na kun?
J.W Hkalup Hpung Ginjaw (KBC)hte hkristu yesu hpe kam sham ai Karai kasang hte seng ai hpung yawng
1.Tengman ai lam hpe tsun shaga ai gaw Karai awng sharawng ai lam re.
2. N teng n man ai hpe ninghkap ai lam gaw Karai awng sharawng ai lam re.
3. Anhte kamsham ai Karai Kasang gaw asak hkrung ai hte tengman ai Karai Kasang re.
4. Madu Yesu asak si hkam ai lam gaw yubak kaw na hkyela ai hte tengman ai lam hpe sakse madun ai lam re.
5. Mawshe gaw Karai a magma gun langai hte amyusha ningbaw langai mung re.
6. Shakawn Kungdawn Laika hpe ka ai Davi Hkawhkam mung Karai a magam hte shinggyim Hkawhkam galaw ai wa re.
7. Hkam sharang lam hpe sharin ya ai Madu Yesu gaw Yerusalem nawku htingnu kata matsat shabat n se n sa galaw ai ni hpe gayat gau shapraw sai.
8. Deniela gaw Hkangkyi lawng hta n hkrit n tsang Karai myiman hpe sha tau let tatut Karai hpe kamsham sadi dung ai lam sakse matut ai Karai a magam gun wa re.
9. Kasa Paulu gaw Roma asuya hpe Karai a magam gun let ninghkap ai wa re. Lahta na madi madun ai lam ni gaw chyum mungga hta ka da ai lam ni re..
Ndai lam ni hpe shani shana hkaw tsun nga ai, anhte hpungwoi ni dai ni gara de n sen pru taw nga ai kun? Jinghpaw Wunpawng nawku hpung masha ni hpe lamwoi nga ai MBC, KBC hte Karai Kasang hte seng ai hpung ningbaw ningla ni..daini anhte mungdan kata byin taw nga ai mungshawa hte hpa rai rau n nga ai? Hpa majaw tengman ai lam ni hpe tsun shaga na matu hkrit tsang makoi agam taw nga ma ai kun?
Karai a magma gun ni rai kun? SPDC (Myen gumshem hpyen asuya) a magma gun ni rai kun? Shinggyim myit n rawng ai matse labye SPDC hpe hpa majaw naw hkrit tsang nga ma ai kun? Hpa majaw tengman ai lam hpe tsun shaga na jawngma ni hpe hkumpat ai? Shingyim myiman hpe tau na kun? Karai a myiman hpe tau na kun? Karai a ntsa sadi dung na kun? SPDC ntsa hta sadi dung nga na kun?
Mungshawa Ni
Daini anhte kadai hpe naw la na? Daini anhte kadai hpang hkan na? Daini anhte hpa galaw na? Jinghpaw mung a matu "K" ni hpe la na kun? KKK ni gaw daini kaja wa Jinghpaw Wunpawng myusha ni hpe lamwoi nga ai kun? Lamwoi lu na kun? Gara hku di nna ndai KKK ni hpe gahkyin gumdin nna "K" langai Jinghpaw hpyendap langai sha tai hkra galaw na? Kadai wa hpe Jinghpaw Wunpawng amyu sha ni a ningbaw shatai na?
RAM MA NI HPE SAW LAJIN DAT AI
Yagon, mandalay kaw nga nna maigan sa lam hpe sha tam let aten shama taw na kun?
Ya ten byin taw nga sai mungmasa satlawat hta hkan nna tinang Jinghpaw mung de lung wa nna jinghpaw mung a matu hkyen lajang ai lam hta tatut shanglawm ga.
Tinang kanu mungdan de lung wa saga. Aten ya rai sai! Jinghpaw mung a matu na a ramma prat hpe labau shang jai lang akyu jashawn na gaw ya aten nan rai sai.
LAUBAN LAU NA NI
Nang lu ai sutgan, ja gumhpraw hpe ndai ten hta myu a matu mungdan a matu jai lang ga. Jinghpaw ni lu ai sutgan gaw Jinghpaw Wunpawng munggdan hte Jinghpaw Wunpawng amyusha ni a matu rai u ga.
HPAJI NINGHKRING NI
Nang du nga ai mungkan gara jut kaw na raitim daini na amyusha ni nga ai Jinghpaw Wunpawng mungdan de wa rit.
Daini Jinghpaw Wunpawng amyusha ni hpe lamwoi ningshawng madun, ningbaw tai na matu wa rit. Lam shagu a matu Jinghpaw Wunpawng amyusha ni nang hpe la nga ai.
Daini n-gup ga hte sha, myutsaw mungtsaw n tsun taw saga. Galaw ra sai magam bungli ni hta tatut shanglawm let Jinghpaw Wunpawng mungdan hpe gawgap la saga.
Masting: Na a gasan hte ningmu laika ni hpe ndai myutsawsakse@yahoo.com de ading tawk ka mai ai lam, chye shangun dat ai.
nkau myi gaw email kaw lu la na sai.
